大夫，我可唔可以做運動？
- Audrey Medicine
- 4月3日
- 讀畢需時 6 分鐘
日日都有人問呢條問題，我發覺原來我答咗100萬次，所以我決定寫篇文去答，以後大家自己睇😂
做運動有好多種：
有啲係團體嘅運動，例如打籃球打乒乓波打羽毛球
有啲係瑜伽，比較靜態
有啲係跑步，一嚟就以幾公里嘅形式進行
仲有行山，踩單車，游水等
首先，答呢條問題之前，每個人都有責任要對自己嘅身體好了解才對！你嘅身體究竟有冇喺度嗌救命呢？
如果呢個人連普通行路都話頭暈，記性又差，呼吸好似有啲困難，月經量少，咁我會建議佢做一啲比較靜態嘅運動，例如瑜伽。
當然啦，做瑜伽都要睇吓呢個人本身嘅脊椎或者盆骨有冇問題，如果好有問題係需要搵一個超勁嘅瑜伽老師去幫，否則自己亂咁嚟係會出事，好快就盆骨更歪，所以有好多人做一兩次瑜伽就連路都唔使行，因為佢哋對自己嘅身體唔了解，唔夠覺察，喺佢嘅身體救命嘅時候，佢夾硬喺度屈仲要慢慢嚟屈，咁就出咗事啦。所以做瑜伽，我覺得一定要有個好老師，貴少少都要搵個好老師！搵唔到就唔好做！
但係可能有啲好虛弱嘅朋友仔，佢哋會話：反而做一啲好激烈嘅運動之後身體好似好啲喎！
究竟係點解呢？
因為本身佢嘅身體可能有100個分子嘅位置，但係佢啲血可能得10個分子嘅存庫。咁呢個時間，做運動就可以令到呢10個分子，好似長期都佔據到呢100個位置咁。因為增加咗呢10個分子嘅活動度！所以短暫嚟講，做住運動對好虛弱嘅人黎講反而會覺得自己嘅抵抗力好啲，精神好啲！跟住就話自己健康咗😂
但係大家有冇留意其實夾硬做運動係幾危險，聽過運動員猝死未？
點解？同本身裏面塞左有關係！但係一個人點解會塞？正常嚟講我哋身體係可以將所有嘅垃圾排出體外㗎！但係當呢個人嘅身體非常之虛弱嘅時候，（中醫嚟講多數係陽虛），呢個人就不能夠將啲垃圾排走，造成一種虛塞嘅情況！如果係一啲屬於虛嘅病人，夾硬做一啲強度高嘅運動，例如係跑步，好飛快咁樣踩單車等等，其實係會用咗身體裏面嘅存庫！而且做運動正常嘅人係應該會出汗。（唔出汗屬於非常陽虛嘅人，呢啲人係應該要盡快睇中醫，否則真係擺唔耐！）出大汗其實係會傷津液，傷血。由於血同津液係氣既載體，所以下一步就係會傷氣同埋傷陽！所以虛嘅病人，夾硬做高強度嘅運動，短期之內係會得到好嘅感覺，例如開心咗啦，身體好似好咗，個人精神咗，抵抗力高啲！但係長期嚟講其實係虛耗同埋損耗緊自己裏面嘅存庫！用晒就冇㗎啦！所以做做吓突然間用晒喎，跟住就拜拜……咁呢啲就唔叫做有智慧嘅運動😭
咁虛弱嘅人應該做咩運動呢？點解要講兩次呢？因為虛弱嘅人已經唔記得我上面講緊咩啦😂佢哋個腦會唔夠血㗎，分析能力會低咗，同埋好攰等。好啦，我唔好再拉去第二度啦，如果唔係佢哋永遠都唔記得㗎啦😂虛弱嘅人係應該做一啲比較柔和嘅運動，例如瑜伽，打太極，呼吸練習，步行，好慢咁踩單車，甩手操等
大夫，你咁講，咁做運動係冇益㗎啦？但係做運動會長命啲喎！
我絕對好支持大家做運動！但係首先你哋要將個身體搞好！唔虛弱，氣血足嘅人，係應該日日都要做吓運動！每一日都做唔同強度嘅運動，進行唔同嘅肌肉訓練。例如一個禮拜可以做兩日帶氧運動如球類運動或者係行山踢波，兩日肌肉訓練，兩日呼吸練習或柔和氣既運動如太極，最後一日係休息。
你哋想做運動有好嘅結果，又長命又健康，前提就係要有足夠嘅氣血！否則做運動就係將自己裏面嘅存庫虛耗咗出嚟，係要還㗎！做運動係一定不能夠補氣血㗎，佢只會用咗啲氣血！所以有啲人話自己練氣係靠做運動，我真係笑咗出嚟😂話咩自己氣虛所以做運動練氣😂乜料啊😂仲有啲歌手，係靠跑步存氣，越來越多氣喎😂實不相瞞啦，其實我都係一個好有實力嘅歌手😂我只不過係唔公開唱啫，我唱上海灘嗰陣時你都唔知喺邊😂做運動係唔會儲到呢啲氣！(係啦.你啱重點啊.知道我喺度讚美緊自自己😂)作為一個歌手儲氣係靠練歌，增加裏面嘅空腔感，增加丹田嘅氣同力，同埋食補氣嘅中藥，仲有要開聲，當然啦好勁嘅歌手其實唔使開聲😂佢生出嚟已經開咗聲😂
講返正題，一個身體好嘅人唔做運動，就會變成氣滯血瘀！做運動，喺身體好嘅基礎上，係可以幫手行氣活血，疏肝解鬱。咁大家身體就會好啲，唔會有淤塞嘅問題，而且做運動可以幫手排出「貝多芬」😂，咁大家就會更加開心！
運動嘅種類：
🌈老人家易跌倒，要防止因為跌倒而引致骨折嘅問題，老人家係需要進行肌肉訓練！特別係雙腳嘅肌肉訓練！另外仲要鍛鍊佢哋嘅反應，同埋手部嘅肌肉！所以如果一個老人家行得走得，我會建議佢哋多啲下蹲，同埋做老人家專用頻率嘅震震機！如果屋企有錢嘅話不妨買一部老人家專用震震機俾佢哋！真心係值得投資！當然啦日間嘅護老中心其實係有提供嘅，但係啲老人家要排隊，佢哋又懶所以未必個個有做。
🌈游水係非常好嘅運動，靠浮力可以鍛鍊到全身嘅肌肉，唔使傷害到膝頭，同埋一啲重大關節。當然啦如果姿勢唔好嘅除外啦😂但係有一個問題，必受寒。所以好多睇我嘅游泳代表隊，女士們都係有一種問題，就係M嘅問題。會比較多血瘀或者唔嚟M等。鍾意游水嘅人唔落水會周身唔自在，所以冇辦法，呢啲人只可以定期食中藥，又或者係練功。
🌈球類活動可以鍛鍊大家嘅反應，增加團體合作嘅精神，而且同唔同嘅朋友仔玩嘅時候其實真係會好開心！只不過球類活動嘅出汗會比較多，但係佢比跑步其實係健康好多！所以如果有機會約齊人係應該要做多啲球類活動！但係當然啦book場係一個問題。同埋人多就容易有運動嘅損傷injury😂所以我多數鍾意打羽毛波又或者係乒乓波😂有如玻璃嘅我可以避開實質性嘅碰撞！(其實係太大隻怕震傷人😂)
🌈跑步係隨時可以自己一個人參加，而且係有目標性嘅運動。但係有一個好大嘅問題，最容易傷膝頭同埋腰關節最後頸關節嘅運動就係佢🤦🏻♀️所以有好多研究都係用呢個運動嚟做😂跑步嘅姿勢，跑鞋，大家嘅足弓有冇問題等，真係要認真咁去對待。
🌈行山係咁多種運動裏面最疏肝解鬱㗎，因為當大家去到一個好高嘅地方嘅時候，就會知道自己有幾咁渺小，呢個時間就咩執着都冇晒。但係本身有膝頭傷患或者係老人家其實係唔可以做一啲太劇烈嘅行山運動…否則佢行完呢一次山之後可能都係要揸拐杖。所以大家要留意，帶老人家去行山求其行一條直路就算。後生仔就應該要多啲行山，着返長衫長褲，防蚊同埋帶足夠嘅水但係唔好帶太多嘢，仲有就係防曬等！
🌈踩單車亦都係非常之疏肝解鬱，行氣活血嘅，有好多女仔啲M塞住咗，踩完單車就嚟到M。但係室內嘅單車就比較難做到呢個效果。可能係因為室外踢單車可以睇到好嘅風景，令人心曠神怡？但係同行山一樣都係要留意太大汗呢個問題，不過行山同踩單車其實大家可以控制返嗰個速度同埋節奏，如果本身係虛弱嘅人就唔應該去得太盡或者太快，行少少,踩少少,慢慢嚟,咪算囉。長命功夫長命做！
最後，有啲運動員呢，有比較難生BB嘅問題。點解呢？就係因為我講嘅虛耗過度！傷腎氣！其實你唔好睇啲運動員咁大隻，咁多肌肉，多數呢啲人先係最虛🤦🏻♀️有時越大隻嘅人越虛！呢啲人可能補極都好似黑洞咁好難補到！唉！而且因為佢哋就算得嗰10分但係個表現好似100分咁，所以佢哋連自己虛咗都唔知😭到知嘅時候可能得返0.1分，已經太遲。
所以都係嗰句啦，大家都大個啦，要自己對身體負責任，感受吓你嘅身體有啲咩投訴，佢需要啲乜嘢，唔需要啲乜嘢，做嘢唔好超出佢嘅極限，慢慢嚟等佢慢慢接受，佢攰嘅話就休息，佢虛嘅話你就要補，佢塞咗你就要通返，佢想飲水你就要飲但係又唔好飲過量，個人盡量變得透明，唔好咁執着，唔好咁多嘢諗，放鬆啲，咁天地嘅氣先可以幫你補充！做唔到上邊幾點，做幾多運動都冇用嫁🤗🌈
Comentários