孕婦要狂補？！

孕婦有冇需要狂食中藥？

好搞笑㗎喎，真係有好多孕婦呢，有左先走過來話要食中藥㗎喎！

其實孕婦唔係病人啊，都係嗰句啦，唔使專登因為有左所以要補要中藥嫁。

我建議大家如果想個BB健康聰明伶俐，係懷孕之前，兩夫妻都要食中藥！

因為BB天生係咩水平，咩高度，係來自精子同埋卵子！

呢啲叫先天，冇得改變！

如果先天不足嘅話，BB嘅資質一定會差啲，後天未必追到。

即係譬如你搵咗個好高大威猛嘅男人做老公，然後你都好高大威猛，基因上面嚟講你哋兩個個BB應該都係高大威猛㗎嘛，係咪？呢啲叫先天！原來我哋身體裏面嘅腎精，就係由爸爸媽媽嘅精子同埋卵子決定佢嘅強度嘅！咁所以如果爸爸嘅精子比較弱，媽媽嘅卵子比較廢，就算你食幾多安胎中藥都搞唔掂㗎啦。

咁安胎中藥有咩用呀？有啲孕婦本身氣血真係好虛，有機會比較難保到個胎......

咁呢啲就應該要喺有咗之前就開始嘗試食咗一啲大夫處方嘅安胎藥先。

因為有咗之會好驚好緊張㗎，你呢個時間先去搵大夫？！講真啦，你都唔信佢啦！你最多咪攞咗啲藥喺屋企擺！

所以個Step就係咁樣嘅，簡化嚟講：

懷孕前：男人補精，女人補卵＋搞好子宮（清垃圾，種草）

未懷孕：做功課嘅時候已經攞定少少安胎藥嚟嘗試吓，食睇吓受唔受到先

已懷孕：正常女人安胎以心情為主；虛甚孕婦的確要養胎，甚至保胎

孕九月：如果有需要先要清胎毒，冇需要唔使清。千祈唔好自己去藥材舖亂咁執清胎毒嗰啲藥嚟食，有機會大出血。

開刀BB：要早少少開始同大夫溝通，睇吓幾時要開始停中藥！

反而產後呢就緊要啦！呢個有機會再同大家講講。