點解唔可以蒸身/焗桑拿/浸熱水？

夏天出汗，臭臭好困擾。

但係其實出汗係健康嘅指徵，多數陽虛嘅人先出唔到汗。

有好多病人過嚟睇症，你問佢：如果天氣熱啲，你出唔出到汗？如果佢答：我出唔到汗呀。咁你就知道佢身體一定唔會好！又或者如果佢唔係全身都有汗出，身體剩係得少量位置有汗出，咁樣都係有問題！

當一個病人嚟睇咗段時間，佢身體好啲嘅時候：大夫，我做運動終於都正常有汗出啦。咁你就可以放心了。

咁點解出汗係咁緊要嘅呢？佢唔係淨係用嚟降溫㗎咋咩？！當然唔係。

首先，我哋要明白出汗嘅機制。喺正常情況嚟講，汗係陽氣蒸騰水液出去身體外邊而流既，如果身體裏面有毒素，就可以帶埋呢啲毒素離開身體。所以一個正常健康嘅人，佢有足夠嘅陽氣，當身體裏面有需要嘅時候，佢就可以發呢啲陽氣去出汗。

咩叫身體有需要？大家要明白身體係唔會做多餘嘅嘢！唔好以為個身體係你話事，其實佢係有awareness：有佢自己嘅智能㗎。所以出親汗都係代表佢有嘢要做，（除非係自汗嗰隻病人），例如佢要排毒，降溫，或者將你啱啱做完運動嘅毒素排走等。

例如凍親，有寒邪塞住係身體外邊，以致身體表面嘅氣行得唔暢通，所以就周身肌肉痛＝感冒。如果呢個病人成功用中藥或者物理嘅方法令到自己出一身汗，就可以將呢啲寒邪逼走，咁佢就會直接好返！

唔識出汗，其中一個嚴重同主要原因係因為陽氣虛，因為陽氣唔夠力去出汗排毒，所以長期塞住啲垃圾喺身體唔同既位置，久而久之係會有唔同嘅疾病發生，例如皮膚病。

點解係陽氣呢？你就當陽氣係普通嘅氣，再加埋一啲火：要呢啲火先燒到啲水液變成蒸氣，跟住變成汗液。一個人純粹有啲氣未死得，就唔代表佢夠火。呢個就係冷汗同埋熱汗嘅分別。譬如有啲人做完運動，個身體裏面好似撻着咗個引擎咁暖暖哋，咁佢就會出啲熱汗，係健康嘅表現。

用木桶蒸身/焗桑拿/浸熱水一類型嘅嘢，只喺身體外邊加啲熱氣去蒸嗰啲水份變成汗液流出。但係佢就做唔到補充陽氣呢一part啦，所以呢啲唔係真正嘅熱汗，唔係健康嘅汗，只係有汗流再加埋出邊有啲熱，所以好似有啲熱啫。如果你係氣功人，呢個時間感受你出嘅汗，都係冷汗。又或者你越蒸會覺得越寒冷。

長期用呢個方法去迫自己流汗嘅人身體會越嚟越差㗎，點解呢？

因為其實原來汗/水/血係身體裏面係裝住陽氣嫁。本身你個身體因為唔夠陽氣，所以佢啲汗唔想走，因為汗都裝住陽氣。我頭先講嗰個身體係唔會做多餘嘅嘢，除非malfunction。你個頭腦可以害咗你去決定對自己身體做啲白痴嘅嘢，但係你嘅身體絕對唔會咁樣對你！所以當你個身體知道你唔夠陽氣嘅時候，你就唔會流汗，因為佢都想保留啲陽氣喺個身體裏面；又或者，你個身體裏面根本唔夠火去燒嗰啲水變成蒸氣變成汗流出嚟, etc.

但係呢個時間你覺得周身好似有啲攰，好想去蒸身/焗桑拿/浸熱水。因為身體表面唔夠陽氣，寒同水濕之邪就會無野去處理/整走佢哋，所以佢哋就會留喺身體，於是乎你就會覺得個人好攰，冇乜力，周身唔聚財。蒸/焗桑/水之後，寒/水濕/毒素同埋垃圾會離開咗身體，你又覺得個身體好舒服。誰不知陽氣亦都一齊離開咗你！咁當下次又有呢堆寒/水濕/毒素/垃圾嘅時候，就會冇野幫手排走佢哋，所以佢哋就會可以喺身體裏面任意逗留。又或者等下一次你再做蒸/焗桑/水，所以做呢啲係會上癮。因為你唔做，就周身唔聚財。但係做咗，陽氣就會越嚟越唔夠，身體反而越嚟越差。只可以講，如果想慢性自殺，呢種係一種非常有效嘅方法！lol!

好啦，咁如果一個人冇汗出，我哋應該點做呢？

補陽： -食中藥

-浸溫泉（地下之火煉成，真溫泉，陽氣十足）

-曬太陽

-煉氣功（點解唔係練習個練？而係火字邊？因為佢可以補陽呀嘛！)

呢篇文章係趣味性唔高，而且講得太短，其實仲有好多嘢可以深入研究，但因為我今晚要睇症，純粹係快啲覆個病人所以寫㗎，拜拜！