感冒與敏感

感冒如果唔係細菌感染，真心用中藥會快啲同埋清得好啲！

（細菌感染多數係有綠色嘅分泌物同埋會發高燒etc！）

上年個抵抗力班已經教咗大家點樣分證型同埋用啲咩方藥，

所以基本上我啲病人都有藥傍身，然後可以自己搞掂㗎啦，

分分鐘佢哋仲叻過新嘅中醫畢業生lol.

感冒一般可以分：風熱，風寒，虛人，痰濕等。

如果夾埋夏天就可以再分暑濕，秋天就風燥，etc.

其實如果啱啱開始感冒，食得切中藥，只食一次藥就會完全好返！

當然啦，如果食錯咗就梗係會變嚴重。

但係如果係啱啱開始感冒嘅時候，例如係風熱感冒，有咽痛等症狀，但係醫者死都要和解少陽，用小柴胡湯，咁就注定咗呢個病人冇咁快好返，就算佢好彩真係好返都好快會再病。

點解呢？因為個醫師自己冇練氣功，佢唔知道小柴胡湯喺身體裏面會引致氣係點樣運行。如果要我喺度講呢，用爆個網站嗰啲Memory都講唔晒！lol~

另外虛人感冒，如果你唔幫佢補氣，個病人又點會好返呢？但冇經驗嘅醫生又用咗錯嘅補氣藥，跟住個病人又嚴重咗...

另外，呢到係香港嚟㗎，華南沿岸濕熱多，好多醫者覺得自己係溫陽聖手，或者覺得個病人係陽虛，又用左溫陽去寒既藥方，咁好容易又變咗肺炎......

其實喺香港生活一啲都唔容易，大家都係希望開開心心返工，健健康康生活，不如快啲令到個病人好返先啦，唔好咁執着，之後佢哋好返咗先再慢慢補返！當然可能好多大夫都擔心個病人唔會再返嚟俾你補，但係你哋要對自己同埋個病人有信心先得㗎！佢有需要又覺得你好嘅話，佢一定會返嚟搵你㗎。如果佢唔返嚟咁你哋都冇緣份啦。所以，唔好搞到個病人嚴重咗先，係首要嘅條件！

一定要搞清楚個證型！

另外就係啲病人自己作業，一開始感冒就要戒口，我喺中大嗰個網上講座已經講咗原理。

唔好飲湯，唔好食湯麵，唔好食小籠包，唔好食任何增痰濕嘅東西！

如果大家唔記得可以上去睇返：https://youtu.be/hlqajFvpi3A?feature=shared

好啦，咁敏感症又係咩事呢？

正氣內存，邪不可干

敏感症有分鼻敏感，皮膚敏感，眼敏感等。

多數病人都係有虛嘅問題！氣虛，陽虛，血虛，脾肺腎虛,etc.

所以與其Focus喺治標清敏感，不如治本補氣血陽！

e.g. 有好多男性喺醫鼻敏感嘅時候，其實性功能都會有好大嘅進步，更加容易生育！

如果醫者勁到可以用針做到補陽嘅效果，病人嘅敏感症就會消失。直至到佢下一次虛嘅時候先會再發作！

發唔發作呢，就當然要睇吓個病人自己有冇作賤自己呀！

例如佢又唔瞓覺呀，又多嘢煩啊，飲食又有問題啊，明知自己虛又唔搵大夫去補一補氣，咁咪發作囉！

除咗虛之外呢，敏感仲有另外一個好重大嘅朋友，就係大腸！

如果飲食唔好，消化差，或者暴飲暴食，或者食垃圾食物，條大腸又唔靚呢，好快又會敏感發作！當然啦益生菌梗係幫到少少！但係最快始終都係戒口，食返啲好啲嘅食物，蔬菜生果，有益而富有營養既食物。

所以有部份嘅病人呢世都喺度感冒嗰啲呢，其實就係自己作賤自己......

嬰兒嚟講，濕疹或者敏感症同奶粉有密切關係。

只要你用岩奶粉，佢嘅敏感症可以喺一兩次奶裏面消失！

所以父母要留意！