其人如狂

Audrey Medicine
3月29日
讀畢需時 4 分鐘

有冇見過有啲好靚嘅女士，喺M前嘅時候發晒癲，好似控制唔到自己嘅情緒咁？如果同呢啲靚女熟悉嘅人就知道，呢段時間要避開佢，或者唔好講錯嘢得罪佢。又或者你有無曾經試過喺嚟M之前個人唔同哂，總之情緒好唔穩定，你唔係好認得呢個人甘呢？究竟經前綜合症係咪正常嘅生理現象，定係其實係一種病理嘅現象呢？

其實經前綜合症嘅性格改變，睇嘢唔順眼症，係一種病態，同更年期綜合症嘅炆憎一樣係需要治療㗎！咁究竟係點樣演變成咁樣，同埋裏面嘅身體係發生咗啲咩問題呢？

張仲景好早之前就已經講過：

太陽病不解，熱結膀胱，其人如狂，

血自下，下者愈。

其外不解者尚未可攻，當先解外。

外解已，但少腹急結者，

乃可攻之，宜桃核承氣湯。

原來呢種情況係日積月累嫁😱

一開始呢個人有感冒或者係其他嘅太陽病，然後可能因1）感冒未好返晒，2）又或者唔睇大夫喺度漚，3）又或者係用咗西藥撳住咗啲邪氣，完咗之後又冇用中藥排返走，🤦🏻‍♀️跟住呢堆垃圾就入咗去身體嘅下焦。而女人最大嘅空腔就係子宮，最好係用嚟裝嘢，身體裏面走唔到嘅垃圾，如果唔可以喺大小便或者皮膚走，就會走咗去子宮！😖啲邪係子宮裏積住，又冇得走，積下積下，再加埋身體正常嘅陽氣同engine嘅死氣，就會喺裏面慢慢燒灼，呢啲就叫做化火。逢親係有火喺個身體，如果啲火太大，就容易沿着經絡行上去燒心，心燒心！心火盛嘅情況就會發生！即係會比較容易炆憎，呢個就好常見啦😂。再嚴重啲，發狂：上1分鐘好地地，下1分鐘突然間變咗第二個人，鬧空氣鬧人打人毁物自殘，乜都可以發生。總之就係睇乜嘢都唔順眼。唉。甚至不避親疏，即係話最親嘅人最尊敬嘅人都突然間唔尊敬啦。

但係因為佢唔係真係狂病，唔係一種慢性病，只係一過性嘅啫，一出到M就正常返哂。然後佢或者係身邊嘅人就會知道點解今次會發癲，就係因為經前綜合症😂，跟住生活又正常咁運作，下次再見其人如狂。

但係其實呢種情況需唔需要治療嘅呢？好明顯就係需要啦！

我哋要將呢種瘀同埋熱排走，否則日積月累係會生瘤。呢啲瘤類叫血瘀。以子宮肌瘤為例，35歲之前呢啲婦女都叫做血瘀証，最多都係見到血塊或者M痛等等。但係35歲開始，多數就會化成有形之物。而家啲人比較陽虛，所以可能會早少少由血瘀發展成真瘤㖭！而喺現今呢個社會，40歲嘅女性，大約有八九成，都係會有肌瘤㗎！

所以如果大家嚟M嘅時候有血塊或者M痛，又或者有其人如狂嘅情況，就需要及早治療！係要搵專業嘅婦科中醫去睇，內科中醫同婦科中醫有好大嘅分別！例如其實一個內科中醫係唔知道用中藥點樣去幫手排卵，佢哋最多都係以為跟住教科書就得，其實唔係咁簡單，當然我係唔會講條秘formula出嚟，連AI都唔會知😂

至於安胎方面，內科中醫亦都叫膽太大，有一定嘅危險性，所以佢哋有啲寧願叫人唔好食。仲有好多個連有冇避孕都冇問，年中都唔知殺咗幾多個生…

Anyway~ 講返正題，呢種熱其中一個來源就係感冒！

其實，平時感冒同埋月經嘅時候感冒，係兩種不同既病！月經嘅時候感冒係需要好好咁樣調理㗎！因為如果感冒係月經期發生，或者喺月經前後總之搭到月經期，啲邪可以直接入血室，即係子宮！到嚟M嘅時候子宮關咗門，大鑊啦，啲邪走唔到！咁點算呀？喺下一次嘅月經前後又會再次感冒。萬試萬寧🤦🏻‍♀️除非你自己夠陽氣正氣去化走佢！身體好壯嘅女人當然冇事啦，日日返工放工唔夠瞓嗰堆弱質女流就賴嘢啦！

當然啦感冒啫，大家可以漚㗎，又或者係繼續用西藥。但係最大鑊就係，呢種垃圾留喺個子宮裏面就會製造咗血瘀，所以之後就會有機會，其人如狂，瘀血唔走，或者即多咗瘀血喺子宮，長期嚟講係會生瘤。短期嚟講，有啲機會就係子宮嘅瘀血突然間多咗，所以月經會比較瘀色，多咗血塊，甚至係遲咗嚟M等~呢啲就係，後續嘅一系列問題。

其實做女人好幸福㗎，我哋有月經可以去觀察吓身體發生緊啲咩問題，又或者係身體好健康都可以係月經裏面反映。基本上，所有經前綜合症都係要處理㗎，總之有症狀，就代表身體有相關嘅問題。作為女人，大家應該要觀察多啲自己嘅月經，絕對唔好糊里糊塗又過咗一個月，要好好觀察珍惜機會。