2024 氣候致病特徵

well~ 今年睇完個五運六氣，真心唔想講。

不過逃避唔代表唔會發生，相信而家過咗個半月，大家都已經見到係幾差咁發生梗……🥲

所以我都唔怕講了。

今年favor疫症蔓延，而且對本身潮濕又少太陽既地方同國家黎講（香港/廣東，英國etc），非常之難挨。🥲

除左9月尾到11月尾，呢兩個月如果無 ‘非其時之氣’，應該係病得最少人既，所以想去旅行嘅話，識揀時間啦！🥳

2024年個底係極度寒濕！

即係話就算有太陽嗰日，個底（身體內/泥土內）都有啲陰陰濕濕嘅氣！好容易爆細菌疫/真菌感染etc！如果不幸感冒嘅話就會難好返，不斷反覆再發，即係好返一陣又再病過，上年已經係咁㗎喇，不過今年係再差啲！有啲病人直程係：今日病好聽日再發燒！因為濕代表黐實，就算用抗生素/消炎藥或者清熱/去寒中藥去打走咗熱氣/寒邪，但係濕就唔肯走。大家記唔記得我幾年前嘅朱古力實驗？食完朱古力之後點解會病嗰個video？就會係咁樣，佢一路都唔肯走，黐實咗！咁由於濕又係有黏力㗎嗎，所以如果剩返少少濕係個身體裏邊，佢又會癡番啲熱/風/寒返嚟，跟住就會重新病過。明無？ 

咁既然知道點樣會搞到病，即係識醫啦！就係成個過程一定要去濕，就算食西藥/中藥都好keep住都要去濕！不過去濕，講就易，做就好難！只要個天氣一濕，即係個氣候餵你食濕！如果呢個人本身脾腎虛，中藥根本唔夠個天氣鬥！即係話食好多包中藥，都未必去完個濕…… 老實講，醫患都會好沮喪。不過可以點啫？就只可以不停咁樣醫同一個人…… 每個人睇醫生嘅時間都會相應咁延長……………nooooooooooooo!

如果啲老人家聽到話去濕，佢哋又好開心！佢哋就會狂煲去濕湯俾啲仔女飲！但係因為佢哋冇學過中醫，唔知道就咁飲去濕湯都會傷身，跟住啲仔女又越飲越虧，（如果啲仔女本身冇脾腎虛嘅話，其實飲少少係冇事㗎！ 但係香港人，經過香港教育制度嘅不斷折磨，其實有邊個唔係虛呢？以前耕田嗰度就真係幾健康嘅，不過而家嗰堆全部都幾廢！唉！） 一開始自己亂飲去濕湯嘅時候，的確會感覺良好一陣，不過過咗段時間就會開始虧之全表現！例如M少咗，久而久之走佬，甩頭髮，尿頻，腰酸腳軟，性功能…唔想講啦。 大家記住呀，薏米飲少少，一次兩次冇所謂，如果有個人叫你成日飲，你就要質疑佢係咪一個勁嘅中醫啊！薏米係會洩咗腎氣，未必補得返㗎大哥大姐！洩咗腎氣除咗病仲會早死，所以如果嗰個中醫叫你去濕飲薏米，佢應該係間接提早送你一程！真係大吉利是！記得幫我話俾大家聽，救得一個人得一個人！你知啦，如果呢個世界太少人，冇人聽我發噏瘋陪我傾偈，我會好寂寞㗎嘛！

被害臟腑：脾，腎

（脾為後天之本，氣血生化之源；而腎為先天之本！即係五臟六腑裏面，此兩個臟腑係最緊要的！可想言之，今年要幫人生仔一啲都唔易！因為子宮同精都會寒同廢啲……

另外今年虧嘅人要補氣血，亦都係事倍功半！

我知道有好多大夫都好有抱負，但係我哋做中醫嘅，只可以順應自然，不能將全部責任擺喺自己身上，盡力而為！ 努力不懈！就可以了，如果唔係今年應該會有抑鬱症同埋對自我能力嚴重質疑！啲病人，如果下年氣候好，接佢哋症又好容易醫得好，咁下年接佢哋嗰個大夫就行好運囉！都好呀！個病人始終都會好！我覺得今年既情況，稍微加大藥量可以，但係唔好加太大，玩火會自焚。係安全用量就好啦！呢度始終都係香港！ 我哋要嚴謹啲！無內地做中醫咁自由，可以開到好大量有毒中藥都patpat冇事嫁！keep our standards!）

2024易發生的疾病：

• 病毒/細菌感染，唔止上呼吸道感染，可於全身任何一處，如眼/耳/皮/陰道/腸道等。

• 超多腸胃炎，腸胃炎感冒(一發作搵我，即刻比藥你，太易醫了)

• 皮膚病(好難醫好，反覆不斷發作！)， 皮膚爛/出水/生怪瘡。

• 痛症，突然間勞損發作，更易受傷。

• 周身痛，全身冇力，好似好懶咁。

• 頭昏頭重好似戴帽咁唔舒服，諗野慢。

• 消化功能減，胃腸病疾病。

• 心悸，心臟功能減弱。 

• 素虛之人五臟六腑功能都廢，e.g. 耳水不平衡發作

• 抑鬱症發作。

• 唔夠陽氣的人心臟病發，更易猝死，特別年中急病死的人多。

• 精寒不育，宮寒不孕。（唔好咁白痴走去溫宮就諗住搞掂！lol! 要食補腎藥㗎！否則嘥晒啲時間。仲有做完功課之後，唔好亂做針/灸/溫宮，否則個胎冇咗都唔知……）

(太多啦，真係不能盡錄啊大佬！)

初之氣：1月21日-3月21日，香港會遲10日到14日完。

風火寒濕交爭，互不相讓！

天氣提早溫暖，但係不斷又凍又熱咁樣，好煩，著多啲又熱，著少啲又冷親，吹親又耳水不平衡發作，又感冒咁。

有疫症(e.g. 腺病毒，covid19，流感etc)出現。但係其實全年都差唔多有疫症出現㗎，就算所謂安全啲嗰兩個月都有，只不過係安全啲罷了…… 即係吊頸都要唞吓氣……

起病急，變化快！即係傳染病，或者出血症，有分泌物病，如鼻炎/鼻涕難清，尿道炎；頭痛不斷，咽痛/失聲，暗瘡/毒瘡/爛皮，皮膚乾燥痕癢，中風，出血性中風。

＋2024易發生的疾病。

二之氣：3月21日-5月21日，香港會遲10日到14日完。

無拿拿又寒番…… 搞到啲氣屈住係中焦，易有氣痛/氣滯/氣鬱，胸腹脹滿症狀的疾病，如消化不良，胃腸道疾病。

肝鬱而家先發作，失眠/抑鬱/炆憎/乳房脹痛/m痛，肋骨神經痛等。

夜晚瞓覺出汗，口瘡，尿道炎等。

＋2024易發生的疾病。

甘點做好呀？（因人而異，未能盡錄）

1. 早睡早起，做適當的運動而非過量，保持良好的生活習慣及流通的空氣。

2. 少食生冷或者凍飲，以免傷陽氣。

3. 今年唔好食濕嘅嘢，例如係飲潤既湯（如沙參麥冬蘋果雪耳），海鮮特別係大閘蟹，仲有朱古力，酒，蛋糕，甜品等。（請睇我中大個YouTube有更多詳細嘅講解：https://youtu.be/hlqajFvpi3A?feature=shared)

4. 食少啲自助餐或者暴飲暴食，唔好傷脾胃！

5. 盡量唔好去多人嘅地方聚集，少啲不必要既gathering，唔好交換細菌病毒，保持良好的個人衛生，碰觸口鼻眼耳前需要洗手，如果真係去多人嘅地方戴口罩。

6. 保暖，不要再吹風受寒。

7. 冬天可行的話，離開太寒冷嘅地方，去溫熱嘅地方避寒兩個月，也可浸溫泉。（冇避孕的婦女不可浸）

8. 勿進行太多傷腎活動...😂

9. 病左不要拖：盡快找自己的家庭中醫或西醫處理！今年濕，拖都唔會自己好。

10. 3月21 +/- 10日前，盡量唔好食熱氣嘢，唔好吹風，頭要保暖，唔好淋雨。

11. 3月-5月做適當運動，早睡早起，也盡量不要食辛辣。

記語：暫時我哋身處嘅世界，都係一個不斷嘅循環，高低起跌，

差嘅氣候而家受咗，遲早都會有好嘅氣候出現。

大家一齊捱完今年，希望明年會更好！