變靚啲，小菜一碟啦！

當你身體健康啲嘅時候，面色好啲，自然有仙氣！

基本上我哋啲病人食幾日藥，仙氣返晒嚟！ 塊面水潤左，眼睛又水汪汪左，嘴唇唔使搽唇膏都紅咗！使鬼化妝或者狂facial咩！

想當年喺大學，因為耳仔軟，俾美容院屈咗好多錢，有一次要出動到好朋友收左我張信用卡同做完入去救人！呢啲真係莫逆之交！每一次做完Facial都係一個短暫性嘅好，當然走米嗰啲就真係少咗，因為即刻清哂！同埋嗰啲按摩係舒服嘅！至於啲機械有冇用呢，其實而家啲科技咁發達，人哋落咁多錢去投資，應該係有啲用！但係如果你身體唔好，做黎都嘥氣啦！

真心，如果要keep到長期，唔使化妝都睇落去面色好，一定要用中醫調理：食藥＋內科針灸！記得係內科針灸，而唔係好似大多數中醫咁，淨係針塊面=.=

淨係針塊面，同淨係做facial一樣，都只係一個無限嘅循環！就係無限循環搵錢做facial/針面/針身，搵錢買化妝品！但係過一排又反彈！自我形象低落！

但係當你身體真係好咗嘅時候，你嘅面係會有裏面發光出來，而唔係揸螢光劑揸到佢發光！

我識得一個非常之有錢嘅闊太，好識養生，基本上佢連大時大節都淨係搽唇膏，叫做禮貌敷衍下。但係佢塊面就永遠都好似化咗妝咁靚！皮膚又白又滑！咩做facial/化妝，佢根本唔會嘥時間喺呢度！人哋啲時間寧願用嚟調理吓，又或者做運動！

至於我，識得我耐嘅病人應該知道，我一開始頭一兩年因為大學同事嘅同化關係，係會搽粉底返工。嗰陣時最緊要係，啲衫要着得靚，攞返個名牌包包，有啲行頭，返工又要帶返啲鑽石呀金呀咁樣。

但係自從離開咗白色巨塔之後，好彩遇到師父，教識我回春之術同煉丹。之後我都再無化妝返工，個人亦都變得更加平實同天真，而且容顏都保持到逆向發展！

至於啲白髮係專登保持既，本身我諗住一畢業就去染成頭白髮，因為病人總係相信一啲假象。而且而家個樣越嚟越後生，其實已經冇乜人相信我唔係新畢業⋯⋯ 所以我喺練功嘅時候冇搞下個頭！🤣🤣🤣🤣🤣🤣

Conclusion

中醫美容/回春方法：

1. 中藥調理：冇病強身補氣血陰陽，有病醫病

2. 內科針灸：打通12經絡，任督二脈，奇經八脈

3. 如果局部有瘀塞不通，垃圾排不走，才加上局部針灸：針面/身

4. 練功

自己要：

1. 做充分嘅運動（勿過量）

2. 足夠睡眠和休息

3. 冇壓力/處理到壓力

4. 飲夠水好重要

5. 飲食：如果大家勉強減肥，只會越嚟越衰，面色越嚟越衰，頭髮越來越少。唔好彩可能會生cancer！有啲case係閉經，正常飲食之後就嚟返M。

6. 如果要皮膚好靚，盡量少食刺激性嘅物品同酒類，例如係辛辣又或者係熱氣。

7. 單身嘅朋友仔如果有興趣嘅話，盡量搵個自己鍾意又對自己好嘅伴侶拍下拖！結婚之後有良好嘅性生活係必須嘅！咁樣荷爾蒙會正常啲，人當然都會靚啲啦！