論中大醫院虧損的原因
- Audrey Medicine
- 2月18日
- 讀畢需時 3 分鐘
已更新：3月29日
話說中大今日send個優惠出嚟俾中大舊生去中大醫院度睇醫生或者check，我都冇睇清楚係乜，只可以話中大醫院多年來入不敷支其實係有一個好明確嘅原因，雖然嗰班係我嘅舊同事，但係我都要講真話。
一個病人去醫院睇西醫，同埋去診所睇西醫係有好明確嘅分別。中大醫院runs到似一間診所咁。呢個就係一個重要嘅死因。
Well~ 就算我哋舊生點捐錢，點樣泵水都好，搞唔掂㗎！簡單啲嚟講可以每日開都係蝕錢。
個個教授喺裏面好犀利呀，但係一個禮拜可能淨係返半日，大佬呀，半退休生活適合教授，教授又要睇症又要教書，咁病人呢？病人唔係半退休咁病，有啲病人可能需要密少少複診，但係唔好意思啊book唔到！下，睇吓我個學生啦！下！”我有錢嚟中大醫院交錢但係唔係諗住睇你個學生囉。”我已經聽到好多病人咁樣反應。大佬我夾喺中間都幾難做。
例如一個產婦，佢想喺嗰度生BB，佢都唔介意個價錢有幾貴啦。你知道我啲病人都唔睇價錢，個個都好錫啲BB。咁中大係貴過仁安，而仁安又貴過同一個私家醫生診所睇。好啦唔講價錢，例如嗰個孕婦第一次去嗰度睇，可能全個過程要用個半鐘頭，價錢貴得來係好好嘅care，的確係唔差㗎。🌈💕但係提供咁好嘅服務既教授就唔多啦，咁點算呀？同一個時間段，仁安可能已經睇咗四個，可能係6000到32,000。但係中大用呢個時間嗰個教授只係搵到千幾蚊。好啦，校友你好市儈喎，作為一個醫者竟然講價錢？！我想話，用長時間去睇一個病人係咪代表係最好嘅care？病人需要乜嘢？對病人嚟講，可能時間係金錢呢？佢想15分鐘搞掂！佢唔想成個晏晝都係呢度咯！😂點解其他醫生可以提供一個同樣standard既care，但係教授就唔得呢？因為好多時教授係需要講埋書㗎嘛😂我會建議其實教授搞返啲免費班俾呢一班病人群就搞掂，所有嘢淨係講一次！免費班可以擺上網，比全香港嘅市民睇，又或者淨係比呢一班病人群睇。仁安都有呢啲免費班喺網上。例如懷孕一個月有咩要注意？懷孕三個月有咩要注意等等。
所以，病人需要嘅服務唔係用長時間。反而，急性嘅處理對去醫院就診嘅人嚟講更加重要。當呢位孕婦睇完醫生之後，醫生會送本書仔俾佢，送好多資料性嘅嘢俾佢，好似上咗一堂好寶貴嘅課程，但係，護士會+1句，如果早產嘅話呢就要去公立醫院生。的確，早產係仁安都未必會接㗎，(但係其實都有少少機會㗎😂)。所以去公立醫院排隊又係必須㗎。但係有個好嚴重既問題，教授你一個禮拜返半日，如果孕婦揀咗你，然後，你嗰日教緊書，孕婦突然間要順產，其實唔容易搵到你返嚟！咁就可能要去公立醫院或者你嘅同事。救命呀！仁安係呢一方面呢就做得好好多！因為個醫生全職睇症，全職幫人生仔，佢要沖都沖到返嚟！
所以中大醫院核心性嘅問題係乜嘢呢？其中一個，就係佢本身嘅初心，係為咗俾啲教授半退咗休之後繼續可以睇症，但係，有時病人需要嘅唔係一個好有經驗嘅教授，而係一個可以長時間隨時陪伴喺自己身邊，比到適當照顧自己嘅醫生。因為呢一間係醫院，而唔係診所！當然啦，我知道有更加多問題，費事講😂
要改革呢間醫院好容易，將佢核心價值同埋態度完全改革就會可以喺短時間之內轉虧為盈。但係冇乜可能……
所以作為忠心嘅校友，就算拉大隊用佢嘅9折服務，又或者係捐錢，其實都已經救唔返佢。
留言