平安過度2023年要點做？

大夫你點解又去旅行？！

WELL, 本身費事製造恐慌我都唔想講咁多！但係見到一個又一個中招唔講真係有啲對唔住自己：

2023年嘅五運六氣其實除咗我同你哋講嗰啲重點之外，仲有一個好大嘅特點，大到我要避開佢......

就係呢一年除咗3月21到5月21左右係安全之外，其餘時間都係favour疫症流行

*即係個氣候容易令到有新嘅疫症出現；

又或者係舊有嘅疫症又會快速變種，令好多人感染*

所以我哋淨係，係安全時段開放⋯⋯

大家都知道我鐘意做養生調理，主要以治未病為主

所以譬如一個病人醫醫下腎虛，跟住又中咗疫症或者感冒，跟住變咗醫感冒，然後又冇咗一個月時間，其實都幾灰，雖然話作為醫者應該要non-striving/ 無求姐， 但係其實感冒個個中醫都識搞啦，使唔使專登搵我呀？（雖然我真係幾唔錯）

最慘就係疫情流行期間好多人都會中招：佢哋食食吓你啲補藥，然後感冒，就會覺得係你啲藥搞到佢咁樣。然後呢世都唔信中醫......呢樣嘢真係好難防止！（我自己係過來人）而且，呢種感覺同俾人老屈係無異！明明你啲藥可能令到佢個感冒冇咁大鑊，又幫佢抗左癌/瘤，但係佢哋根本唔會知道，亦都唔會欣賞到。當然啦，好正常嘅！我明。any肥，你就當我好似Sheldon咁特別啦～

大家都見到其實五月中開始

大家嘅covid係差唔多要好返先check到+ve，即係要好多日先+ve，好明顯已經超變種，

另外又有新病毒出現咗......

近排見到啲病人發燒基本上差唔多4-5日

完全同近排嘅火同埋燥係相關連嫁！

咁嘅天氣點樣補啊？！

即係個個黎開清熱藥？！大佬我唔想作業囉......

另外仲有人問我可唔可以做天灸：

喺咁嘅疫症流行年間搞埋啲咁嘅嘢，會唔會變咗皮膚出疹好難好，又或者係即刻變喉嚨痛/中招/發燒呢？......自己諗啦！

我會建議各位治療師真係睇清楚如果個病人本身有陰虛，今年真係唔好同佢哋做！！！呢啲位要小心啊，一陣俾人有位入就唔抵呀！！

又或者用你嘅技術，等佢明白佢係應該要醫好左佢嘅陰虛先！

講真香港人有幾多個冇陰虛？個個都有啲！

因為我哋夜瞓到爆，而且工作勞累，飲食不節呀！

嗰啲太陽燈同埋生活習慣都係favour我哋會有陰虛！

當然我哋個個都有啲陽虛，但係又真係個個都有陰虛啊！

至於病人有咩要留意？

1）今年健健康康嘅時候就要珍惜啊！有得玩要玩，有得食要食。見吓年紀大嘅屋企人！

2）盡量唔好喺七月尾之前食熱氣嘢！

3）另外真係食維他命C加zinc！

睇返我段片喺YouTube有教大家揀維他命C加zinc！唔好再拖唔買啦！如果你抵抗力低，至少要食足一年！

有個病人停咗兩日就中左招發燒！

4）飲多啲水

5）8月前，得閒去游水。大海水係唔錯嘅選擇～

6）休息充足

大家保重～

到你哋腰酸骨痛周身痛嗰個月，我就差唔多返嚟🧝🏻‍♀️