中醫美容

講到中醫美容

真係一件蛋糕咁容易嘅事

大家要知道我之前係教過呢一樣嘢😂

而唔少闊太，都係中午/下午茶場嘅熟客，專過嚟變靚啲又或者係瘦身🤗💕

咁點做到真係美？

咁就要睇吓大家要追求持續性有幾耐嘅美！😍

一般，如果夠氣嘅病人，的確係可以用美容針做到瘦面或者瘦身嘅效果

大家見到插秧嗰啲網上廣告就知道(姑勿論佢哋係咪合法去賣廣告先😂)

但係針，真心用得越少越好！

插到成塊面都係針，除非個針灸師氣好好，心地又好，否則係瀉法，其實好危險！

“頭，為諸陽之會”: 即”人體清陽之氣皆上注於頭面！”

如果個施針者唔知自己做緊乜，又或者佢好攰，返太多日工，冇乜氣… 又或者佢太耐冇接地… 又或者佢太耐冇練功… 又或者佢根本唔知氣係咩嚟，咁你啲陽氣就屙拔甩！😂🤷🏻‍♂️

如果有啲為咗迎合病人全套服務嘅貪念，駁埋電，玩埋拔罐，仲好玩，陽氣，拜拜。

不過就算佢有氣，都要係一個好好心地嘅人，先會同你慢慢玩氣。

另外，氣，係會被心念影響。

所以搵針灸師，除左搵功力夠，仲要搵心地好嘅，你明啦？！

一般插秧可以維持嘅效果，真心唔耐！😂其實係自我感覺良好😂

所以我一般唔會做呢樣嘢，呢樣嘢嘥我時間。你知啦，同一個病人唔通叫佢過幾日返返嚟咩？我呢度唔係美容院，唔係玩格仔或者套票！佢返嚟多啲其他都有需要幫既病人就冇機會睇！

我做嘅嗰一隻技術就難啲，如果控制得唔好，會有出血嘅風險。但係維持到好耐！

所以呢啲係唔可以擺上網賣廣告😂

一陣人哋照住學一半，咁就大鑊！

另外仲有徒手美顏，

呢樣嘢，如果大家認識顱底骨療法，就知道唔可以亂玩。

你改變左人哋個面形，你就要為人哋嘅全身骨架肌肉筋膜嘅動態平衡負責任，否則人哋其他地方係會唔舒服嫁！

跟住仲有中藥敷面，

講真啦，呢隻自己做啦😂

但係，效果都唔會維持好耐！

咁究竟咩先可以維持得耐啲？

我自從學咗中醫之後就冇再去美容院，自問唔使化妝出街都有一定嘅自信😂 why?!

頭先講咗：頭，為諸陽之會

所以要靚，或者係防止老化，永遠青春，需要滿足以下幾點：

你有心搞，唔係本啤: 因為有啲人可能覺得內臟健康緊要啲，魷魚遊戲緊要啲，咁就唔會嘥時間喺塊面度。
你嘅心情冇抑鬱，你日日都開開心心: 呢個係前提。否則冇得搞！肝鬱嘅人容易出斑出扁嘴皺紋眉頭皺紋！
你嘅精神唔勞累，你嘅心力要夠，另外休息都要夠，營養又要充足: 否則一定會喺面上面顯露出來。以上三點如果滿足唔到，咁都幾難搞，咁係冇可能靚or 青春！
一定要夠氣血，夠陽氣: 氣血，陽氣足夠就可以上注頭目，咁你皮膚，頭髮，眼睛，耳朵，腦力全部都會好。一個氣血唔足，陽氣唔夠嘅人，做幾多Facial都搞唔掂。大家過嚟睇中醫嘅時候有冇留意，有啲女孩子係冇化妝，但係食咗兩三次藥之後，就算冇化妝睇落都係有啲仙氣，面色紅潤有光澤，嘴唇粉粉地，而且皮膚冇搽粉底都好似搽咗咁，眼睛水汪汪有精神等，就係呢個道理！如果需要化妝嘅靚女其實再簡單啲，食完中藥之後易上妝好多！
如果配合埋煉功，煉氣，仲可以回春，耳目聰明，頭髮反應記性好，皮膚細緻等！但係能夠做到第5點嘅人，必先要開始第4點嘅調理。