2024年8月-12月常見病及處理(附上:大夫放假宣布)

Audrey Medicine
2024年8月31日
讀畢需時 3 分鐘

係時候開估新五運六氣🤦🏻‍♀️

大家有冇留意七月中開始多咗人中COVID或者係急病？

例如感冒，手足口，總之都係一啲急病。

其實七月中後期開始行嘅五運六氣就係大風加大濕，再加埋全年嘅膽: 極度寒濕(大家可以睇返3月6號我網站寫個篇文: 2024氣候致病特徵)

即係話呢兩個月係:

🌱頭頸/心肺/上焦(五官：眼耳鼻舌)/皮膚/身體外部

🌱急性病，表現係急性發作，突然出現

🌱有風動嘅症狀: 例如跳動，痕癢(疹，咳)，歪斜，抽筋，痙攣等

🌱肝鬱，乳房月經病，症狀而家突然間發出嚟

🌱出水，水腫，身體裏面有水，皮膚滲水

🌱腸胃炎（急慢性）

🌱難好返，反覆發作，啱啱好返再病過

🌱無力，無幹勁，冇心機，又重又攰

🌱脾胃虛弱症狀etc

然後喺八月尾開始，大地的氣息再玩埋風起了，乾燥了。啲風再推高啲，上個頭，越嚟越危險！(下一段會講點解危險)

即係話風嘅表現再加重！以上講嘅嘢全部加重！

但係濕嘅基礎上再加埋乾燥…即係話可能喉嚨會好乾，皮膚乾，乾咳，便秘etc。你話幾矛盾！好煩！開藥嘅時候惗少一步都唔掂！

咩都上晒去上邊，本身腎虛嘅人，就會更加大風:

所以近排就多咗人係頭部會出現一啲病: 例如好似急性耳鳴，耳聾，突發性嘅頭痛，類似中風，面癱，甚至有人個頭無啦啦喺度跳，又或者係高血壓發作etc~ 如果好彩，去西醫嗰度搵完唔係大鑊嘢，西醫就確診係病毒，有啲就開咗類固醇…Well~ 大家都知道之後有排還啦，食咗就gg…唔食又驚唔好…你話幾矛盾，幾陰公，其實本身無虛，就冇事。

都係嗰句啦💕

正氣內存，邪不可干，邪之所湊，其氣必虛🌈

如果而家先做啲咩補腎健脾，就太遲！🥲

因為而家係發病期！😭

只要虛人，就會乘住個氣的侵襲而發病。

所以而家只可以急則治標: 醫急病。🤦🏻‍♀️

要到好返又或者係個五運六氣平和啲嘅時候，先可以治本: 補返五臟六腑養生。💕🌈

如果近排冇病嘅，恭喜你💕🤗

快啲補啦！😍🌈

九月尾開始，氣會係火+燥，可以暫時抵擋全年嘅膽: 極度寒濕！yeah! 所以照計呢，就會少啲急性病，或者係少啲人需要或者係諗起我地😂當然啦如果識得養生嘅話，就會諗起我啦，不過今季都搞掂哂啲養生人，全部都係11月再返嚟。同埋有個問題係: 啲火燥究竟到時會唔會搞到又唔可以開勁補藥呢？我真係唔知。

我年頭亦都同大家講過，如果大家想安全而盡興地玩嘅話，係應該揀九月尾到11月頭。

然後過咗11月中之後就開始要打大佬，啲風濕病呀，抑鬱呀，陽虛啊，急慢性長期病，所有問題，都會一次過湧現！行家買定藥，準備定都得啦！